HINIKAYAT ng isang miyembro ng makapangyarihang Commission on Appointment (CA) ang sinoman na tutol sa appointees ni Pangulong Ferdinand “Bongbong” Marcos Jr., na lumantad na at ihain ang kanilang reklamo sa nasabing komisyon.

Ginawa ni CA Assistant Minority Leader at Surigao del Sur Rep. Johnny Pimentel dahil nakatakdang isalang ang appointment ni Department of Transportation (DOTr) Secretary Vivencio “Vince” Dizon II sa June 3.

“The public is encouraged to submit to the CA secretariat any information, written reports, or sworn/notarized complaints regarding the appointees,” pahayag ni Pimentel.

Si Dizon ay inappoint ni Marcos bilang Kalihim ng DOTr noong Pebrero 21, matapos magresign si dating Secretary Jaime Bautista dahil umano sa isyung pangkalusugan.

Nagsilbi din bilang Presidential Adviser on Flagship Programs and Projects at Bases Conversion and Development Authority (BCDA) sa ilalim ng administrasyon ni dating Pangulong Rodrigo Duterte.

Bukod kay Dizon, nakatakda ding isalang ang appointment nina Noli Pipo, bilang mga bagong Commissioner, Commission on Elections (Comelec) kapalit ni Marlon Casquejo at Maria Norina Tangaro-Casingal na papalit naman kay Commissioner Socorro Inting.

Kasama din sa haharap sa mga CA sina Luis Meinrado Pañgulayan na itinalagang Commissioner ng Civil Service Commission (CSC) kapalit ni Commissioner Aileen Lourdes Lizada.

Itinalaga rin ni Marcos bilang Commissioner ng Commission on Audit (COA) si Douglas Michael Mallillin kapalit Commissioner Roland Pondoc.

(BERNARD TAGUINOD)